Uitbouing

Uitbouing van Boeremusiek

Om boeremusiek uit te bou of te wel te bevorder is geen maklike taak nie!

Om die waarheid te sê, sonder TV of Radio, is dit amper 'n onbegonne taak. Vandaar die verskillende klubs. Dit bring mens nader aan die lede en ander boeremusiekliefhebbers. Daarom bly ek sê: Ollie Viljoen se TV kompetisie tussen 1980 en 1994, was 'n groot hupstoot vir boeremusiek. Jammer die kompetisie het ten einde geloop. Die nuwe kompetisie op kykNET is darem weer besig om momentum op te bou.

Boeremusiek word op beide die Radio en TV afgeskeep. Volgens die twee media is die kyk en luister getalle baie klein. Ek glo anders. Die boeremusiekondersteuners is te lam om hulle stemme te laat hoor! Ek het by 'n vergadering op 'n Saterdagaand waar 800 Boeremusiekliefhebbers bymekaar was, die mense baie mooi gevra om die SAUK die volgende Maandag te skakel en vir meer boeremusiek moet vra. Slegs 2 persone het geskakel.

	Boeremusiekorganisasies

	Tradisionele Boeremusiek Klub van Suid-Afrika (TBK)
	Op 12 Maart 1981 is die Konsertinaklub van Suid-Afrika gestig. Die Klub het 'n naamsverandering ondergaan in 1989 na die Tradisionele Boeremusiek Klub gestig is. Die Tradisionele Boeremusiek Klub spits hom toe op tradisionele boeremusiek soos wat dit in die dertigerjare van die vorige eeu gespeel was; voordat elektrisiteit bestaan het. Slegs akoestiese kitare word toegelaat wanneer tradisionele Boeremusiek gespeel word.


	Hier is 'n foto van die Konsertina Klub van SA (later TBK) by die eerste vergadering nadat Faan Harris se grafsteen opgerig is. Agter van links na regs staan: Johannes le Grange, Piet Bester, Kalie de Jager, Jasper Vlok, Stephaan van Zyl. In die middel sit Tom Senekal en voor sit Danie Labuschagne, Plato Michael en Lourens Aucamp. Kyk hoe jonk was die manne! Tom was op daardie stadium voorsitter.

	Die Boeremusiekgilde Die Boeremusiekgilde bevorder boeremusiek in al sy vorme en laat dit aan die musikant oor om sy talente te beoefen soos hy dit verkies.
	Die Boeremusiekgilde is op 9 Oktober 1989 gestig. Ollie Viljoen was die eerste voorsitter van die Gilde. Die Gildewerksaamhede word bedryf vanuit twee streke , te wete 'n Noord- en 'n Suidstreek. Verskeie takke is aktief werksaam in elke streek.

	Die Media

	Hoe kan die media Boeremusiek uitbou?

	Suid-Afrika beskik oor 'n magdom van radio uitsaaistasies wat Boeremsusiek kan bevorder en uitbou. Op hierdie tydstip is daar heelwat van hierdie stasies wat Boeremusiek wel bevorder. Ek dink hier byvoorbeeld aan Radio Sonder Grense, Radio Pretoria, Radio Ifm, Radio Overvaal Stereo, Radio Oosrand en Radio Triomf om maar 'n paar te noem. Ons is baie dank verskuldig aan hierdie stasies. Wat oorbly is dat Boeremusiekliefhebbers hierdie( en ook ander) radiostasies aktief moet ondersteun. Hedendaagse tegnologie en elektronika bied gelukkig 'n uitstekende geleentheid om die musiek van die verlede te laat herleef. Verskeie persone en instansies is dan ook tans bedrywig om gewilde Boeremusieknommers terug te plaas op laserskywe. Ekself het reeds die beste van musikante soos Faan Harris, Silver de Lange, Japie Laubscher, Dirk Laas en vele ander op laserskyf gesit. Kyk by Boeremusiek CD's na al die musiek wat op laserskyf beskikbaar is by Alfa Ateljee. U is ook welkom om met my te skakel indien u nommers wat nie meer in die handel beskikbaar is nie graag wil bekom. Ek het 'n baie groot verskeidenheid waaruit u kan kies. Vir u gerief plaas ek weer 'n skakel na my e-pos adres hier...


	Klik op die Radio Pretoria logo hier bo om hulle webblad te besoek!
	Ek was hierdie week letterlik rooi in die gesig. Ek het die vrymoedigheid gehad om aan Radio Pretoria vonkpos te stuur en hulle uit te nooi om na my webblad te loer. Ek was op 'n baie mooi manier tereggewys dat die Uitsaaistasie wat die meeste boeremusiek speel, skaars genoem word op my webblad! Dit is 'n fout wat ek onmiddellik wil regstel en ek sê graag die volgende: Toe die stasie in 1994 gestig is was dit van die begin af duidelik dat Boeremusiek - die Afrikaners se eie musiek - sy regmatige plek sou kry. Veral Tim van der Westhuizen was baie betrokke met die direkte uitsendings. Ekselwers het die voorreg gehad om die program - Gildeklanke - tydens my ampstermyn as voorsitter van die Boeremusiekgilde, aan die gang te kry. Ons het vir Nico van Rensburg gevra om ons amptelik te verteenwoordig. Die program is nog steeds op die lug alhoewel onder 'n ander naam maar Nico is nog steeds die aanbieder. . Na 12 jaar is Radio Pretoria nog net so betrokke by Boeremusiek. Een van hulle personeellede - Hors Prinsloo - se pa - Nans Prinsloo - was 'n vermaarde Boeremusiek Tromspeler en het dikwels saam met die legende - Fanie Bosch - opgetree. Radio Pretoria moet net waak teen slordige Boeremusiek. Net soos enige ander musiek is boeremusiek ook onderworpe aan die reels van musiek soos tyd en musikale akkoorde. Nou is dit so dat Boeremusiek nie bladmusiek het nie met die gevolg dat hy hom oop laat vir misbruik of liewer wangebruik. Vir die oningeligte klink die musiek reg maar dit is baie slordig. Dit laat Boeremusiek wawyd oop vir kritiek. Deur die standaard te lig kan ons Boeremusiek 'n groot hupstoot gee.
	Dr. André Korkie het so pas sy kragte by Radio Pretoria ingegooi en is besig om puik Boeremusiekprogromme saam te stel. André beplan ook om die programme op Radio Platorand aan te bied. Ons sien regtig uit daarna. Ons hoop om ook later meer oor sy programme te gesels. Besoek gerus later weer my blad om te sien oor watter musikante Andre by Radio Pretoria gesels.
		Dr. André Korkie

Radio Sonder Grense en Radio IFM

Slegs 'n paar van ons vriende by die uitsaaimedia op hierdie stadium is:
	Tinus Esterhuizen en Fonnie du Plooy van Radio Sonder Grense Susan van der Merwe van Radio Ifm;
Tinus Esterhuizen		Susan van der Merwe

Het u enige voorstelle oor ander maniere waarop ons kan verseker dat Boeremusiek lewendig gehou word? Stuur asseblief vir my e-pos sodat ons gedagtes hieroor kan uitruil!