Musikante

Hierdie blad word opgedra aan musikante van toeka tot nou wat gehelp het om Boeremusiek tot stand te bring en steeds bydra om die genre te bevorder en lewendig te hou!


	Hier het ons met een van die hartseer verhale van Boeremusiek te doen. Ons kan maar aanvaar dat van al die Boeremusikante slegs die helfte op plaat of CD opgeneem is! Ek het baie van hulle ontmoet en kan getuig dat hulle enige dag net sulke goeie spelers is of was as die wat wel opgeneem is! Maar kom ons bepaal ons by ‘n klompie wat wel opgeneem is – nie noodwendig in volgorde van bekwaamheid of bekendheid nie maar vir die rekord. As u na ‘n sekere Boeremusikant se inligting soek, laat my weet en ek verskaf dit met graagte aan u!

		Hans Bodenstein en sy Vyf Vastrappers. ‘n Puik orkes wat vir ons sommer ‘n hele klomp immergroen melodieë nagelaat het. Let wel ek sê melodieë en nie komposisies nie. Die feit dat hy die nommer opgeneem het is nog geen bewys dat hy dit ook gekomponeer het nie! Hans het aan die Oos Rand gebly en gespeel – veral in die Brentwood Park saal. Hy was ‘n neef van Hans Bodenstein, Manie Bodenstein se pa. In 1922 is die twee Hanse voëlvry verklaar en moes inderhaas met 'n trapfiets na die Vrystaat vlug met die konsertina in 'n kussingsloop weggesteek! Hans, die konsertinaspeler, het in die Vrystaat op 'n plaas aangebly en gewerk terwyl Manie se Pa Hans na Suidwes Afrika is en by die polisie aangesluit het.
	Hans Bodenstein
		Silver de Lange en sy Vyf Dagbrekers. ‘n Puik speler wat pragtige melodieë vir ons op plaat gesit het. Een van die mooiste is Jy Breek My Hart wat later bietjie verwerk is na Lettie se Wals en deur Willie Palm op plaat gesit is. Ek het die voorreg gehad om Bobby Pennels, sy banjo speler, tydens Pietersburg se 100 jarige eeufees vierringe te ontmoet en ook te hoor speel – die verrigtinge is op video beskikbaar.
	Silver de Lange
		Faan Harris en sy Vier Transvalers of Lekker Kerels of Boslansers – hang af waar hy opnames gemaak het. Faan mag maar gespeel het, vir die wat die uitdrukking ken! Hy was weer van die westelike deel van Johannesburg maar het orals gespeel. Faan het een van ons huidige spelers – Wynand Jacobs – die Mielieblare Settees geleer speel! Faan was ‘n letterskilder van beroep en was meeste van die tyd in sy oorpak te sien. Manie en Cora Bodenstein (Sewes van Rensburg se dogter), het albei vir Faan goed geken.
	Faan Harris
		Joe Hooneberg en die Baanbrekers. Joe het amptelike musiek opleiding gehad maar verkies om Boeremusiek te speel. Daar is natuurlik omtrent geen bladmusiek vir Boeremusiek beskikbaar nie. Vir my is sy mooiste nommer Die Pietersburg settees ook genoem die Resiesbaan settees!! Sy ander bekende nommer is O, My ma! Wat Manie Bodenstein in die vyftigerjare van die vorige eeu opgeneem het en daarna vir Rassie Erasmus die nommer geleer het. Rassie het die nommer by Columbia opgeneem saam met Tienie Coetzer op banjo en hom genoem : Konsertina en banjo!
	Joe Hooneberg
		Willie Welgens en sy Suikerbossie Orkes. Twee name wat sinoniem met die orkes was is Dawid de Lange en George Abrahams. Dawid het gesing en George het banjo gespeel. Hierdie orkes was sò populêr dat hulle op ‘n stadium die Singer platemaatskappy alleen aan die gang gehou het! Dawid se populerste nommer was waarskynlik die Kalfie Wals. Maar die het hy met die Nagloopers opgeneem. George was ‘n uitmuntende banjospeler en was onskeidbaar van Willie. Hulle het mekaar wonderlik aangevul. Tienie Coetzer het gesê: “Jy vergelyk nie George met iemand nie want hy was ‘n klas van sy eie.”
	Willie Welgens
		Fanie Bosch. Fanie het ‘n eie soortige musiek gespeel wat heeltemaal verskil het van die veterane hierbo genoem. Hy was natuurlik bevoorreg dat hy om die hoek van Joe Hooneberg gebly het en heel dikwels by Joe gekom het. Daarom sal die manne met die fyn ore vir jou sê daar is ‘n groot ooreenkoms tussen die twee se style! Hy het veral kitaar gespeel as oom Joe konsertina gespeel het. Fanie het baie nommers gekomponeer wat nog steeds deur baie Konsertinaspelers gespeel word. Sy Jakaranda vastrap het drie dae na hy op die mark gekom het reeds 60,000 eksemplare verkoop! Ek het so ‘n idee dis ‘n Boeremusiek rekord! Fanie was Nic Potgieter se held.
	Fanie Bosch
		Manie Bodenstein. Nou wat sal ons van die beskeie Musikant sê? Manie is sonder twyfel een van ons beste Konsertinaspelers ooit! Manie se musiek is nie beperk tot Boeremusiek nie, maar Manie speel al die musiek genres! En dit op ‘n 3½ ry konsertina! Manie spog ook met ‘n aantal pragtige komposisies waarvan Lentebloeisels seker die bekendste is. Ek glo sy produktiefste tye was saam met Hendrik Susan se Orkes en later saam met die Polisieorkes. Manie is natuurlik ook die man wat vir Nic Potgieter en Danie Barnard “ontdek” het. Ek wy later ‘n hele blad aan die aangeleentheid. Ek kan maande lank oor Manie skryf maar wag dat ek van u hoor wat u wil weet!
	Manie Bodenstein
		Nico van Rensburg. Aangesien Nico met Fanie Bosch se suster Annatjie getroud was, wil ek nou oor hom skryf. Annatjie is op 17 Desember 2001, oorlede. Nico is die Boeremusikant wat die langste, sonder onderbreking, ‘n boereorkes van sy eie gehad het waarmee hy uitgesaai, kompetisies gespeel en danse gehou het. Hy doen dit nou al bykans 50 jaar! Ek wil graag Cora Bodenstein aanhaal oor sy spel: “Nico is ‘n “gepolishde” konsertinaspeler!” Nico is die man wat die grootste tjek jaarliks van SAMRO ontvang – dit spreek boekdele!
	Nico van Rensburg	Annatjie van Rensburg
		Nic Potgieter. Ek het die voorreg gehad om die afgelope 5 jaar voor sy dood op 10 November 2002, baie met hom te kuier. Gevolglik het ek goed kennis gemaak met al sy talente! Sy kennis van Boeremusiek was fenominaal. Maar hy het ‘n passie gehad vir ‘n mooi melodie. Daarom dat hy so wyd gespeel het – om die waarheid te sê, hy het uit al die musiek genres gespeel. Sy ander passie was dat ‘n melodie “reg” gespeel moes word. Daarom noem hy sy konsertinakursus: "Speel die konsertina reg!" Maar sy grootste passie was om konsertina te speel. Hy het eendag vir my gesê: “Kalie as ek konsertina speel maak ek liefde met die instrument.” Dit was van Nic se grootste bates as Konsertinaspeler: sy “touch” en sy gevoelvolle interpretasie! Nic het ‘n klompie pragtige komposisies gemaak waarvan Bokveld en Verleë wals seker die bekendste is. Nic was ook ‘n baie goeie kitaar- en banjospeler en het in 80 films vir die SAUK opgetree!
	Nic Potgieter
		Willie Fourie. Ook bekend as lang Willem, speel van tradisioneel tot modern en het ‘n baie groot reportoire. Ek het baie van my kennis oor die musiek self by Willem opgetel. Willie is die man wat die Boeremusiekgilde die langste op die uitvoerende bestuur gedien het naamlik: 12 jaar. Slegs sy gesondheid verhoed dat hy nie meer op die bestuur dien nie. As jy na ‘n musikant soek, skakel Willie, hy het almal se nommers! Willie speel al 64 jaar Boeremusiek! (sien: 60 Goue Jare.) Willie is getroud met Lenie en hulle het 5 Januarie 2002 hulle 50ste troudag gevier! Groot vriend van Al Debbo en oorlede Jurie Ferreira.
	Willie Fourie
		Tom Senekal. My groot vriend. Ons het mekaar bykans 30 jaar gelede by die Kommando raakgeloop. Hy was 2IB van die kompanie en ek was RSM. Ons was toe nog albei jonk en mooi. Tom het by Manie Bodenstein oorgeneem by die Konsertinaklub van SA as Voorsitter en sodoende het ons saam op die bestuur gedien. Later het ons weer saam op die Boeremusiekgilde se Hoofbestuur gedien. Tom het as jong man vir Fanie Bosch banjo gespeel. Ek is mal oor Tom se styl – so ‘n verligte tradisionele styl met so bietjie Tom Senekal “fingering” by. Tom het ‘n groot aanhang in Pretoria en het al ‘n mooi klompie kompetisies gewen! 'n Kliek op Tom se foto sal u na 'n blad neem waar u van sy CD's kan bestel...
	Tom Senekal
		Hennie Henn. Vroeg in die 60’s van die vorige eeu het ek met Hennie bevriend geraak. Ons het so van huis tot huis gekuier met sy konsertina en Boeremusiek bevorder. Dit het aanleiding gegee dat my pa George de Jager na 25 jaar weer begin speel het. ‘n Paar jaar daarna is my konsertina “gesteel” en oom Piet Bester kry hom in “Rhodesië.” Hulle reël byeenkomste in samewerking met Lourens Aucamp en hy op sy beurt reël ‘n Konsertinaklub uitsending by die SAUK in 1978. Kliek op Hennie se foto om te sien watter van sy CD's is hier te koop! Toe oom Piet Bester by my kom in 1981 en sê ek en hy en Manie Bodenstein en nog so ‘n paar ander moet vir Faan Harris ‘n grafsteen opsit was die konsertinaklub van Suid Afrika alreeds in my onderbewussyn. Die ledegeld moes betaal vir die grafsteen sodat alle Boeremusiek liefhebbers in Suid Afrika kon bydra. So is die Konsertinaklub van Suid Afrika amptelik in die kantore van die SAUK gestig op 12 Maart 1981. Die stigterslede was : Manie Bodenstein, Piet Bester, Jimmy Henning en ekself. Jimmy is intussen oorlede. Ek het nog goeie kontak met Hennie.
	Hennie Henn
		My pa, George de Jager. By hom en ander boeremusiek musikante het ek my liefde vir Boeremusiek ontvang. Sy konsertinaspel was deel van ons huishouding!
	George de Jager
		Pieter Zwart. Ek het die voorreg gehad om vir Pieter Zwart 'n CD by die SAUK op te neem. Daar het ek agtergekom dat Piet weet wat hy wil doen en hoe hy dit wil doen! Wat 'n puik konsertina speler en mens. Sy karakter word weerspieël in die hulp wat hy aan jong musikante gee. Al die jongmense aan wie hy hulp verleen het, het al kompetisies gewen! Hyself het ook talle gewen. Manie Bodenstein sê sy konsertina spel staan soos 'n seer duim bokant baie spelers se spel uit! Pieter dien tans as Voorsitter van die Noordwes - tak van die Boeremusiekgilde. Kliek op Piet se foto as u wil sien watter CD's van Pieter u by ons kan koop.
	Pieter Zwart
		Jurie Olckers is sedert sy kleintyd al bekend by Boeremusiekliefhebbers. Huidiglik kan ons hom as "herontdek" beskou want ek is oortuig daarvan dat ons nog baie van hierdie uitmuntende musikant en kunstenaar gaan sien en hoor.
	Jurie Olckers
	Dit is die punt van die ysberg sover dit musikante aanbetref. Daar is nog baie maar ek laat dit aan u om te vra van wie u wil weet. Stuur vir my e-pos dan gesels ons lekker oor die musikante.